Oktoberkonkurranse

Konkurransen blei administrert av Audun Hølleland. Fem av styret i BioFoto Sunnmøre og Nordfjord har utgjort juryen. Det var 13 innsende bilde, og juryen kåra følgjande bilde til dei tre første plassane:

1. Nøtteskrike – Skarp og fin nøtteskrike og fargane gir ein god harmoni. Trestammane rammar fint inn hovudmotivet, og fargane i bakgrunnen harmonerer også med resten av bildet. Utsnittet er noko knapt, og litt meir rom kunne kanskje vere ein fordel. Foto Jan Rabben.

• Blad – Enkel komposisjon med god balanse. God djupneskarpheit på bladet, som er hovudmotivet. Bakgrunnen har fin bokeh, sjølv om den er skarp nok til å kunne konkurrere noko om merksemda. Bakgrunnen har fine fargar som harmonerer med fargane i bladet. Bildet gjev samla sett ei harmonisk oppleving i komposisjon og fargar. Foto Åse Solvi.

• Skarv  – Roleg og reint skarveportrett. Litt mykje isostøy i bakgrunnen, men samtidig utgjer denne eit nesten akvarellaktig uttrykk som bidreg til stemninga i bildet. Bakgrunnen kan eventuelt også vere noko negativt påverka av jpg-komprimering. Bildet kunne tene på ein litt betre balanse der det var mindre med under skarven i høve til romet over. Foto Atle Helland.

Me gratulerer dei tre vinnarane!